Stiúr: Bob Quinn
Éire 1978
65 nóiméad
Teastas: 12
Rinne Bob Quinn an scannán i gConamara i lár na seachtóidí agus craoladh é don chéad uair Lá 'le Pádraig 1979 ar RTÉ. Mar a tharla nuair a cuireadh The Playboy of the Western World ar an stáitse don chéad uair, ní mó ná sásta a bhí roinnt daoine leis an léargas fírinneach a tugadh sa scannán ar an saol i nGaeltacht Chonamara. Ag an am deineadh go leor gearán le RTÉ faoin scannán. "Disgraceful and disgusting" a dúirt duine amháin de lucht na ngearán.
B'é Colm Bairéad ó Charna a scríobh an script don scannán. I measc na n-aisteoirí bhí Cyril Cusack, Niall Tóibín, Dónal Mc Cann, Mick Lally, Macdara Ó Fátharta, Tom Sailí Ó Flaithearta, Mairéad Uí Chuaig agus Johnny Chóil Mhaidhc.
Baineann an scéal le beirt rógaire (Dónal Mc Cann agus Niall Toibín), atá ag iarraidh an ceann is fearr a fháil ar an sean Stiléara (Cyril Cusack). Tá idir greann agus gruaim sa scannán.
Tá an taispeántas seo eagraithe ag Club Scannán Sailearna, mar chuid de Sheachtain na Gaeilge le caoinchead Bob Quinn agus Cinegael. Tá an Seanscoil curtha ar fáil ag Comharchumann Shailearna.
