(Al midan)
Beidh Treasa Ní Cheannabháin ag cur an scannáin seo i láthair na féile.
@ni_treasa
Tugann an scannán faisnéise seo an lucht féachana go ceartlár na réabhlóide a tharla ar Tahir Square na hÉigipte mar a raibh sé ina chíor thuathail ar feadh tréimhse. Léirítear gnéithe éagsúla den éirí amach: an réabadh agus an clampar; dílseacht agus paisean na ndaoine; míreanna YouTube, comhghuaillíochtaí a athraíonn ar iompú do bhoise gan trácht ar arm a bhíonn lá leis na daoine agus lá eile ina gcoinne. Tá radhairc iontacha anuas ar an aicsean a thaispeánann na sluaite ag plódú na cathrach. Tá teachtaireacht ann: ní bheathaíonn na briathra na bráithre; tá gá le hagóidíocht fhisiciúil chun torthaí a bhaint amach. Beidh an lucht féachana i ngreim ag an scéal seo, scéal nach bhfuil deireadh fós leis.
